Psa 65 | PMA | STEP | Ahi onomai, tahos imok keke mevahati lat isom en Hou Saeon, ka mehehuli kat hatkatien keil koa memumoni ral minuk,

Psalms 65

Out Vasi Amusau Masmas Ahi

Souen tai onen Deved

1 Ahi onomai, tahos imok keke mevahati lat isom en Hou Saeon, ^{▼▼65:1 Saeon vi hou tai koa taon ten out Serusalem ka Eim Votut onen Ahi lumul ien.}
ka mehehuli kat hatkatien keil koa memumoni ral minuk,
2 veni keik komul kosan aneite ten hisien keil onomai.
Meatin keil ten out vasi imai venuk,
3 veni sakkalkalien keil onomai amuas komai,
ka keik kosahul lin tisaen keil onomai ka konaleletei mun natisa en komai.
4 Sien hel en koakeil keik kolei kan keil
keke umai avato en vieh ten Eim Votut onom.
Komai mehelonge hetahos imok en mormore tounah keil onom ten demkatien
koa amul en Eim Votut onom.

5 Kosan aneite ten hisien keil onomai navong meloh lin meatin sav keil en avong ten rea.
En keihoen komutut komai.
Meatin keil rahit out netan ka en usi atas,
keil amul aling desien one enuk.
6 En keihoen onom koling kat vatihou keil,
keil arie lat mari keihoen onom.
7 Kosakin atas keil amerau,
verien ten tahe keil, komuasi va netan.
Kosakin koakeil amumon selien,
aro raeng.
8 Meatin keil ten out vasi en out netan
amuti manin ven marmari tounah keil koa komumoni.
En keite vasi keil ten out netan,
meatin keil amakul en sien venuk.

9 Kolei kat revi atan ka kosan ous musani,
kosakin amas mul ien ka tounah vasi amoul tahos ien.
Kosakin oai vilelau en poal keil,
ka kosakin anien mul moul en out netan.
Keik komul komumoni mukok:
10 navong meatin keil akah lin out evus,
kosan ous musani.
Atan koa keih, ous sakini memerau,
ka tounah vasi akilea avahitehiteh eni.
11 Ven tahosien onom, kosan amas min komai.
Out vasi kova ien, amas musiluk.
12 Kosakin tirendan esomai avilelau en atan onomai,
hou keil avilelau en sien.
13 Tirendan keil esomai avi houlu,
ka kosakin ah esomai avilelau en anien.
Tounah vasi koa moul alonge tahos ven amas onom,
ka amusau masmasuk.